主耶穌原來很早已在我職場中引領我 黃偉業弟兄
最近返主日學，重新認識職場的定義，原來當初返學，學校生活已經係職場嘅開始，那麼我在職場打滾已經是數十寒暑了。
感恩由於讀基督教小學，從小已經認識主耶穌。我是返下午班的，而下午班每日上課前都會於地下禮堂背誦日常禱文:“求主耶穌，教我做人，日日作事，能盡本份，行為誠實，說話講真，常存愛心，樂意助人，奉主名求，阿們。” 雖然以前唔知道信仰係乜嘢，但係呢段禱文都深深印喺腦海。一直幫助我喺學業時期保持做人處事嘅態度。而其中“能盡本份”呢四個字更加係我一直以來嘅做人做事的宗旨，不知不覺形成自己的“Can Do”態度。
當初出社會找工作，並無特別的目標及夢想，只知道要有理想的收入、工作唔辛苦就得，聽一啲師兄講藥廠銷售人員是頗好的出路，於是循住這個方向找工作，在此行頭一做就做咗廿年，接觸嘅客戶有醫生、藥房老闆、視光師、眼鏡店東主、店舖前線銷售等等，他們有不同性格，不同背景，因此我亦培養出事事俱圓嘅性格。由於自細的“Can Do”及“能盡本份”的態度，在工作上真的幫助到不斷達成公司定下的目標。但亦由於這種態度，使我在一些事情上越了界，當然，當時只係覺得自己只係為咗做好本份 (份工) 啦。
雖然有小學時期的聖經科及之後在社會上道德觀念的引導，知道做人要有底線，不能傷害他人，但原來有時對某人好時，同時會傷害到另一人的。以前對於呢樣嘅嘢真係好矛盾，但係“受人錢財，替人消災”，只好忠於公司嘅政策及目標啦，現實嘛。 感恩兩年多前，主耶穌沒有放棄我，通過爸爸嘅關係，重新尋找我，令我感受到佢嘅慈愛同埋大能，亦帶領住我向著事奉、仿效佢嘅教導方向繼續學習、發展，令我真真正正喺人生上面有一個方向。依家嘅信仰生活非常豐盛，在一個基督教團體工作，工作嘅時間亦都分配到畀我哋去繼續認識主耶穌，例如崇拜、小組查經、分享、聽道，星期六、日又可以返教會崇拜、事奉，願主耶穌繼續帶領。
