尋找 黃偉業弟兄
自小學開始，接觸6年的聖經教育，一直對於神/耶穌的事蹟，只當作一些故仔去聽，甚至有些神蹟亦只當作神話故事，因為在成長當中，曾接觸很多不同的宗教，在電視、電影、媒體，都有很多關於不同宗教的思想滲透當中，尤其受到殭屍片之中的茅山術、神打、占卜，國內外的動畫、小說之中的神話故事、人物，及傳統文化上的宗教、習俗影響，當時個人對於神嘅定義，就只係停留喺有超能力嘅人呢個層次。
我都唔記得咗係中學定大學時，有一位科學課的老師/教授在課堂上，突然發出一個啟發我嘅問題，令到我開始思考信仰，佢當時嘅意思係咁樣問：大家有冇諗過世界嘅起源係咩呢?什麼的事情、問題都有發生的原因，只要一直發問、尋找，就會有答案（呢啲就係科學精神），而原因一直延伸問到底，最終會到達一個起始點，而呢個起始點就係世界嘅主宰/創造者，而創造者/主宰是誰?
這個問題一直在我過往的生活中、成長中影響住我，喺唔同嘅同學/朋友/同事圈子當中，大家都有好多唔同嘅睇法，沒有結論。直至2021年父親於醫院離世時神奇妙嘅安排，終於令我對這個問題，得出一個尋求答案嘅途徑，就係決心再立志追隨主耶穌（廿多年前為咗追女仔曾經立志過一次，但係極少返教會，只係睇過少少聖經，中間甚至離棄過，犯過唔少嘅罪），加入土浸這個神的大家庭。
加入土浸之後，我積極地參與崇拜、主日學、關於信仰的座談會、團契聚會、部門的事奉，一路養成每日禱告、查經、聽/唱詩歌嘅習慣，又不斷跟不同的朋友分享個人見證、信仰上嘅喜樂，希望其他人都好似我一樣，尋找神的時候，神亦同時尋找他們。而一直想追求嘅答案，終於找到了，就是主耶穌基督，只有通過主耶穌基督，我們才能得到最真實的答案，因為只有通過主耶穌基督，我們才能得見神。
現在我經常都會禱告，祈求主耶穌基督一直堅定我嘅信心。每一日嘅生活、未來嘅道路，我都交托俾佢；感恩主耶穌沒有因為我曾經離棄過佢而放棄我，反而通過爸爸嘅關係而尋回我，我會好好珍惜今次主耶穌俾我嘅機會。
