散播福音的種子 蕭冬梅姊妹
感恩可以與大家分享我的職場點滴，可能弟兄姊妹都未必知道我做邊行。 打從2006年開始，本應做開朝9晚5的我，毅然決定辭職返家照顧當時9歲的兒子。話說在我們家做了6年的工人姐姐，因某些原因我們決定不再僱用她；如是者，有8年多我沒有上班，做了全職主婦，直至2014年，阿仔決定去外國讀書，我才報讀「陪月」課程，嘗試參與這個從未接觸過的行業。
入行至今，已踏入第八個年頭了！曾經照顧超過40多個BB同媽媽。 睇返自己入行的經過，真的要感恩，感謝神一路帶領幫助，初初做覺得好辛苦，再踏入職場真係需要時間去適應；每當我想放棄時，神總是用各種嘅方法去幫助我，讓我可以堅持。依家係越做越開心，每做一個Job就多個朋友，能夠得到阿太嘅認同，除咗我自己努力之外，我深深感受到神係我最大嘅幫助者，神為我預備最好的，依家我唔需要自己搵工作，大部分都係我曾經照顧過嘅媽媽介紹；現在，經常同時有幾個查詢或接洽，令我應接不暇。雖然呢兩年的疫情反覆，好多行業都受到影響，但我仍能日日返工做個不停。
我的恩典夠你用的，因為我的能力是在人的軟弱上顯得完全 林後12:9
近年陪月員被吹捧為掘金行業，越來越多人想入行，亦趨向年輕化，老一輩的已經不再受歡迎，年輕媽媽鍾意冇代溝、可以傾到偈的陪月，相信這亦係我嘅強項，鍾意吹水。其實這個行業，人工尚可，不過要做得好，係要付出好大努力，新手父母咩都唔識，佢哋靠曬個陪月，無論起居飲食，產後護理，如何成功餵到人奶，點樣照顧初生嬰兒，一大堆問題…都靠陪月幫手解決，兩個生命喺我手中，責任重大。我老公成日講我份工壓力好大，因為不停轉換僱主，要適應不同人的性格喜好，而我亦規定自己一個Job最多做兩個月，感恩我係一個適應力好強嘅人，能將壓力變成動力，雖然工作頻密，但我會俾時間自己放假休息；選擇呢個行業，就係有得揀，BTW，我今年個期已經全滿。
見證着每一個新生命嘅誕生，每個BB都有唔同嘅性格，將佢哋又細細粒湊到變大大粒，心裏嘅滿足係難以用筆墨形容，我會堅持落去，希望可以幫到更多有需要嘅家庭。每個行業都有自己嘅辛酸，感恩我係做得好開心，我有使命讓人認識神，把福音的種子散播到各家庭中；其實，做到嘅嘢真係好少，求神幫助我。
所以，你們要去，使萬民作我的門徒, 奉父、子、聖靈的名給他們施浸。凡我所吩咐你們的，都教訓他們遵守，我就常與你們同在，直到世界的末了。太28:19-20
